Imvune yo mu Jisho (Subconjunctival Hemorrhage): Impamvu Ziyitera, Ibimenyetso, Icyo Wakora n’Igihe cyo Kujya kwa Muganga

Imvune yo mu jisho niki?

Imvune yo mu jisho ibaho igihe ijisho ryajemo amaraso bitewe nuko hari udutsi duto cyane twakomeretse cyangwa twaturitse bitewe n'impamvu zitandukanye nko gukuba ijisho, kwitsamura n'ibindi, bityo hakabaho ko amaraso yireka mu gice cy'ijisho. Nubwo bidakunze kuba byatera ibindi bibazo ariko ni byiza kubimenya ndetse ukamenya n'icyo wakora mu gihe byakubayeho...

Biterwa niki?

Mubyukuri imvune yo mu jisho ikunze kubaho nta kintu kigaragara cyabiteye. Ariko nubwo bimeze bityo, hari ibintu bitagaragara cyangwa umuntu ashobora kutitaho bishobora gutuma habaho guturika kwa twa dutsi duto two mu jisho, kuburyo ubibona nyuma y'iminota cyangwa amasaha. Urugero:

• Kwitsamura bikomeye.
• Gukorora bikomeye.
• Kuruka bikomeye.
• Gukuba ijisho cyane.
• Gukomereka ku jisho (eye trauma).
  

Ni bande bafite ibyago byinshi?

Bamwe mu bantu bafite ibibazo bikurikira, kuko ibyo bibazo byongera ibyago byo kugira imvune yo mu jisho. Urugero:

• Indwara ya diabete.
• Umuvuduko ukabije w’amaraso (hypertension).
• Imiti imwe yo kugabanya amaraso, nka warfarine (Coumadin, Jantoven) na aspirine.
• Ibibazo byo gutinda kuvura kw'amaraso (hemophilia).

Ni iki wakora mu gihe byakubayeho?

Imvune yo mu jisho akenshi ishobora kubaho yewe ntunabimenya keretse wirebye mu ndorerwamo cyangwa ubibwiwe n'undi muntu. Ndetse bishobora no kuguhangayikisha wibaza icyabiteye cyangwa icyo wakora. Gusa ntibikaguhangayikishe kuko akenshi nta kindi kibazo bishobora gutera kandi akenshi birikiza bikagenda nko mu byumweru bibiri...

Ni ryari wajya kwa muganga?

Niba usanzwe ugira imvune yo mu jisho kenshi cyangwa ukaba ufite kimwe mu bibazo twavuze byongera ibyago cyangwa ukagira ibindi bibazo bijyanye no gutinda kuvura kw'amaraso, gana muganga agufashe.